Friday, October 23, 2020

တန်းတူတန်ဖိုး (Par Value)

စာရင်းအင်း Accounting ကို လေ့လာရင်းနဲ့ တန်းတူတန်ဖိုး Par Value ဆိုတဲ့အရာကို သတိထားစိတ်ဝင်စားမိတယ်။ Stock Share Price စတော့အစုရှယ်ယာစျေးနူန်းတွေကို ဖော်ပြတဲ့ နေရာမှာ သုံးတာကိုလည်း တွေ့မိတယ်။ ဒါပေမဲ့လည်း ကုန်ပစ္စည်းတွေတိုင်းအတွက် တန်းတူတန်ဖိုး Par Value ရရှိအောင်လုပ်ဆောင်နိုင်ဖို့ဆိုတာ တကယ်လက်တွေ့မှာ မလွယ်ကူမှန်းကိုလည်း သဘောပေါက်မိတယ်။

သဘောက မိုးကုတ်မြို့က ဘဏ်တစ်ခုမှာ စုထားတဲ့ ငွေတစ်သိန်းကို မန္တလေးဘဏ် သို့မဟုတ် ရန်ကုန်ဘဏ် တစ်ခုခုမှာ ပြန်ထုတ်ယူလည်း ငွေတစ်သိန်း ရနေခြင်းဟာ တန်းတူတန်ဖိုး Par Value ကြောင့်ဖြစ်တယ်။ အဲ့ဒါကို ထူဆန်းတယ်လို့ ဒီနေ့ ဘယ်သူမှထင်မှာ မဟုတ်ကြပေမဲ့လည်း မိုးကုတ်မြို့မှာထွက်တဲ့ မုံညင်းကို မိုးကုတ်မှာဝယ်ဝယ် မန္တလေးမှာဝယ်ဝယ် ရန်ကုန်မှာဝယ်ဝယ် စျေးနူန်းတူညီနေမယ်ဆိုရင်တော့ အံ့သြကောင်း အ့ံသြမိကြလိမ့်မယ်။ အဲ့ဒီလို တစ်စျေးနူန်းထဲဖြစ်အောင် လုပ်နိုင်ရင်တော့ အဲ့ဒါဟာ တန်းတူတန်ဖိုး Par Value ကို တည်ဆောက်နိုင်လို့ပဲ ဖြစ်တယ်။

တနိုင်ငံလုံးအတွက် ယေဘူယျအားဖြင့် တူညီသော ဆန်စျေး ဆီစျေး ဖြစ်ဖို့ ကုန်စျေးနူန်း တည်ငြိမ်ဖို့ဟာ တန်းတူတန်ဖိုး Par Value ကို တည်ဆောက်နိုင်ရင်ဖြစ်တယ်။ ကုန်စည်လဲလှယ်ဒိုင် Commodity Exchange Center တွေဟာ တန်းတူတန်ဖိုး Par Value ရရှိဖို့ ကြိုးစား အကောင်အထည် ဖော်လေ့ရှိကြတယ်။ ဝယ်ရောင်းလုပ်ကိုင်ကြသူ Dealers တွေဟာလည်း စားသုံးသူတွေအတွက် တန်းတူတန်ဖိုး Par Value တည်ဆောက်လေ့ရှိကြတယ်။

တန်းတူတန်ဖိုး Par Value ဟာ စားသုံးသူ Consumer တွေအတွက် အကျိုးများစေသလို နိုင်ငံတစ်ခုအတွက်လည်း စျေးနူန်းတည်ငြိမ်ရေး Price Stability ဆိုတဲ့ စီးပွါးရေး ရည်ရွယ်ချက်တစ်ခုကို ပြီးမြောက်စေတယ်။

Thursday, October 22, 2020

ဒိုင်ဗာစီဖီကေးရှင်း

အကောင်းဆုံးရင်းနှီးမြုပ်နှံမှုဟာဘာလဲ?

ခင်ဗျားသိချင်သလို ကျွန်တော်လည်း သိချင်မိတယ်။ ဒီမေးခွန်းရဲ့အဖြေကို လူတော်တော်များများ စိတ်ဝင်စားကြသလို Markowitz မားကော့ဝစ်လည်း စိတ်ဝင်စားခဲ့တယ်။ မားကော့ဝစ်မတိုင်ခင်ကတော့ အဖြေမှန်ကို ဘယ်သူမှမသိခဲ့ကြဘူး။

မားကော့ဝစ်ဟာ သချာင်္ပညာရှင် ဖြစ်ခဲ့သလို စီးပွါးရေးပညာရှင်လည်းဖြစ်ခဲ့တယ်။ တနေ့ မားကော့ဝစ်ဟာ ကုမ္ပဏီတွေရဲ့ နှစ်စဉ် အမြတ်ရာခိုင်နူန်း မှတ်တမ်းတွေကို လေ့လာကြည့်ရင်းနဲ့ အမြတ်များတဲ့ ကုမ္ပဏီတွေရဲ့ ဆုံးရှုံးနိုင်ချေ Risk ဟာလည်း ညီတူညီမျှများနေတာကို တွေ့ရှိတယ်။ အဲ့ဒီကစလို့ အကောင်းဆုံးရင်းနှီးမြုပ်နှံမှုဆိုတာမရှိပါ။ ဆုံးရှုံးနိုင်ချေများလို့ အမြတ်ဟာလည်းများရတယ် Higher Risk Higher Return ဆိုတဲ့ အချက်အလက်ဟာ တွင်ကျယ်လာတယ်။

သဘောက ဘဏ်တစ်ခုမှာစုထားတဲ့ငွေဟာ အတိုးရာခိုင်နူန်းနည်းသလို ဆုံးရှုံးနိုင်ချေလည်းနည်းတယ်။ စတော့ရှယ်ယာစျေးကွက်မှာ ရင်းနှီးမြုပ်နှံတာဟာ အမြတ်များနိုင်သလို ဆုံးရှုံးနိုင်ချေလည်း ပိုများတယ်။

နောက်တစ်ခု မားကော့ဝစ် တွေ့ရှိတာက အမျိုးအစားမတူညီတဲ့ ကုမ္ပဏီတွေမှာ နည်းနည်းချင်းစီ ခွဲပြီး ရင်းနှီးမြုပ်နှံတာဟာ ကုမ္ပဏီ တစ်ခုတည်း ကုမ္ပဏီအမျိုးအစား တစ်မျိုးတည်းမှာ ပုံပြီး ရင်းနှီးမြုပ်နှံတာနဲ့ အမြတ်ရာခိုင်နူန်းချင်း တူပေမဲ့ ဆုံးရှုးနိုင်ချေ များစွာလျော့နည်းတာကို တွေ့ရှိတယ်။ Diversification လို့ ဒီနေ့ လူသိများတယ်။ မားကော့ဝစ်က သူ့ရဲ့တွေ့ရှိမှုကို Modern Portfolio Theory လို့ နာမည်ပေးခဲ့တယ်။

There is no free lunch လို့ ပြောလေ့ရှိတဲ့ ငွေအရင်းအနှီးလောကမှာ မားကော့ဝစ်ရဲ့ MPT ဟာ ယနေ့ထိတိုင် Free Lunch တစ်ခုအနေနဲ့ ကျန်ရစ်နေဆဲ သုံးနေကြဆဲ။